《人住公屋我住公屋》　讓我們反思港式競爭力

ViuTV節目《人住公屋我住公屋》熱播，呢d咁貼地嘅題材，只有ViuTV同港台先會做，如果係大台做，大概就會變左安樂蝸＋更上一層樓，再call埋廣告插半套宜室而居有辦法，話俾你聽，200呎都可能住得好好㗎！ViuTV今次個重點相反，就係透過比較，等你知道香港住得有幾差，用心唔係好，都係鼓勵鬥慘，不過就意外開拓左一個新嘅房屋，甚至係對自由市場嘅新視角，就係完全市場主導，係唔係最有利自由發展呢個問題。

由於今次我主要唔係講個節目，而係節目中帶出嘅思考，所以我就只係Focus onn論點有關嘅內容就可以，所以歐美地區嘅集數我係呢度就暫時唔講了。因為無論文化、社會結構同資源都太大分別，可以參考嘅地方相對較少，所以我會重點講新加坡果幾集，我到底係個節目度見到d乜野。

禮失而求諸野

講起公屋就覺得可悲，窮生由7歲開始係公屋長大。深明以前公屋作為社會階梯的旋轉門是如何運作。到到而家係新聞上睇到公屋嘅失效，公屋反過來成為令下一代不能向上流嘅阻礙，真係喊出黎。更講返歷史，香港公屋政策始於1935年石硤尾大火，當時呢個政府係亞洲真係先驅，連李光耀都專程黎向香港取經搞「組屋」，今日我地捉兩個退休議員過去呻香港公屋點唔好點唔好，真係情何以堪。今日我地社會主流都認為我地應該要參考新加坡「組屋」黎解決房屋問題，真係禮失而求諸野。新加坡組屋嘅成功，仲唔單單係令到國民有屋住，我係節目睇到嘅係正正因為冇人要憂冇地方住，令呢20年新加坡慢慢係國際競爭力，在經濟發展上慢慢追過香港，拋離香港。我地信左咁多年自由市場，係唔係一個時候諗下，點解人地會咁掂呢？

住居問題還是置業問題，重要嗎？

再比較新加坡組屋同香港公屋，其實準確一點，組屋更加似居屋，因為組屋以「買」為基礎，有別公屋以租做基礎解決住屋問題。我係十年前曾經好反對以「買」為基礎嘅公共房屋政策，容許用政府資源去幫人上車，直頭係幫人炒樓，我當時認為政府只係有責任幫市民解決居住問題，唔係解決置業問題的。但係兩三年前我對呢個問題又有另一層睇法，呢個睇法係新加坡組屋帶俾我，就係以「買」為基礎，其實對市民，對政府都係雙嬴。香港的公屋雖保護左解決住居問題嘅原則（但居屋就破壞返），但係就造成左今日市民同政府都係雙輸嘅局面。

先租後買乎合現實

係度我又必先提一提，我唔係覺今是而昨非。我一樣係唔讚成而家嘅公屋同居屋可以自由買賣。而係應該透過向政府買／先租後買去重啟社會流轉嘅「旋轉門」。一方面，因為買斷，所以政府係唔需要因為增加出售資助房屋而增加赤字，用居屋嘅經驗睇，直頭會必賺。二來，面對赤貧家庭，可以先租後買，租期設限，令租住資助房屋不能千秋萬世。因為租住過程本身租金平，又可以係期間幫你儲首期，加上日後可以用強積金供樓，理論上只要你肯做，唔會買唔起。三來，就算你真係買唔起，又到左租期要搬，由於你已經享受左多年嘅租金優惠，之後出返私人市場，都好合理，你可以再排過入住資助房屋，不過要俾左非住過嘅人先。日後如果想賣左間樓，一定要賣返俾政府，以當時政府賣俾市民嘅售價做定價，政府再轉售俾輪候冊入面嘅人。如此一來，由於件事有返流轉性，申請人嘅入息同資產上限可以好寬鬆，因為一來政府唔怕蝕錢，可以不停起。二來又可以好似組屋咁，唔同發展項目可以針對唔同客群，提升生活質素。

公屋懲罰「獅子山精神」

因為而家個公屋玩法，根本係只有「有心人」先可以申請，單身人士我地唔講，因為你點搞都係排十幾年。所以單身人士多數要搭一個老人家先申請到。而一個2-3人家庭每月最高入息限額係$17,600~22,390，以一個新婚夫婦計，一人都搵唔到一萬，即係你要上樓，你一定要只得一個人工作，以一個窮人黎講，正常有咩可能容許只有一方出外工作？但係係公屋玩法之下，識玩一定咁樣玩。如此一來一對正常嘅年青人被迫一定要有一方係博殺期停工，正常人都唔會，咁最後咩人會入到公屋？大家心裡有數。

自由市場反封印了香港的競爭力

根據房屋委員會預算 2018/19中的租住房屋運作帳目 提到，單單因為出租資助房屋一年億十億以上，2022年仲會到30億以上，呢個無底深潭意味住你愈增加出租資助房屋，個包袱就愈大。然而，包袱都唔緊要，因為政府唔係一定要賺錢，但係我地睇效果，都唔見得係好。公屋輪候冊由保證3年上樓到而家5年都唔敢保，意味住由於私人市場抽升由資助房屋出現恐慌性需求（我唔認為呢d係剛性需求），居住成本佔了家庭收入超過一半，商業租金高昂又令產業變得單一，反過來對營商環境有害，亦都削弱左競爭力，此話何解？我地只要睇一睇新加坡，就清楚明白。香港人一直相信，好野，就係競爭出黎。因為大家有野追求，就會努力工作去改善生活，係呢個過程入面努力工作，花費，再努力工作，造就左港式競爭力。所以討論房屋問題我地會話，你想住好d，就要努力工作，買靚d買大d。公屋係養懶人，太多人住係公屋，社會就冇人推動，影響競爭力。right?咁多年我地都聽呢d係咪?我地睇下新加坡。80%人住係組屋，平均居住面積大香港1倍有多，具體d講就係3-4人家庭平均人地係住緊過千呎。新加坡人有冇失去左競爭力？新加坡已經過左香港。

其實好多生意，好多發展，係需要空間。空間唔係指土地空間，而係「想像空間」，當你個人唔需要再為生活煩惱，你先會有空間會諗野，去發展自己所長，去Think Big。當所有人一世人嘅終極目標就係層樓，好多理想就冇可能發生，因為香港好多人每月住屋成本佔左收入一半以上，好多人一世人都只係為左係香港安身立命，根本就冇空間想像衣食住行以外嘅事情，變相好少人會係後生一無所有果陣就投入去創業，去長遠為理想打拼。如果單純以港式競爭力想run，想改善生活，所以要努力工作搵錢過更好嘅生活，個結果就係，大家改善左生活，就會收檔，因為個重點係改善生活。而如果你俾空間人去發展，果d人就係為左「做好件事」而努力，所以點解香港難以出國際巨企，因為你幾想改善生活，你有返1億幾千萬你就會想收檔，因為你已經冇咩買唔到，冇咩享受唔到。唯有當你真心去「發展事業」，先可以做得更大，伸到去更遠嘅地方，呢個就係港式競爭力嘅盲點了。